قالوا تحبه قلت ما هوب بالحيل

بس انه أغلى شوي من نور عيني

يسوى جميع الجيل الأول وهالجيل

أحبائي الماضين والمقبليني

شوقي له أعظم من ظما الأرض للسيل

وأشفق عليه أكثر من أم الجنيني

وأحتاج له حاجة ثرى مصر للنيل

وعليه أغار ولو من الوالديني

أشتاق له شوق المحبين لليل

وأرتاح له راحة دموع الحزيني

لا صار جنبي لو سنه وقتي بخيل

ولا غاب لو لحظات صارت سنيني

قالوا يحبك قلت هذا هو الويل

ما ودي أنشد ثم رفضه يجيني

وأهدم رجاي بدبرتي مثل ما قيل

والأفضل أحيا بالأمل لو لحيني

يا حبكم يا ناس للقال والقيل

الله يجازي جملة العاذليني

خلوني أحيا في الوهم يا عواذيل

وش دخلكم والأمر بينه وبيني