انا فاقد شعور احيان انا للحب ما اصلح
انا الراحل وانا الولهان وانا الكذاب والأصرح
انا الواقف على البيبان وابي البيبان ماتفتح
انا المجهول والخسران انا الفايز وانا الأنجح
انا القاسي وانا الوجدان بها الاسرار ماتفصح

شعوري فيه كم انسان حزين وكان بك يفرح
ابي بكره وابي اللي كان ابي امسي ابي اصبح
أبي آسف ابي ندمان أبي مابيك لا تشرح
ابي في نظرتك طغيان وجرح رقته تجرح

نغيب ونلتقي خلان عشان الحب ما يجمح
نعيش بلذة الحرمان نجرب شوقنا المبرح
ابيك تكون لي أوطان بها الثورات ما تربح
نقرب تبتعد ازمان احبك وقت ماتسمح
تعال نضيع بالعنوان عناوين الهوى تفضح
نغيب ونلتقي خلان عشان الحب بي يجمح

تبدل دورك الهيمان تبدل كل هالمسرح
تكون الشر والشيطان تصير الطب لو تجرح
تناقض غير الألوان غوامق خلها أفتح
تبسم واحتضن خذلان وابكي وقت ماتفرح