زارني عقب العشاء طيفٍ يقول

انتبه يا شوق مثلك ما ينام

لو دريت بما حصل شي يهول

كان حاربت الكرى تسعين عام

جعل تدهاك الدواهي وش تقول

وش لفانا اليوم من زود الكلام

قال أنا مريت يوم السبت ضول

عند بابه للرعابيب ازدحام

واسمع امه عند تفصيخ الحجول

والطوايق شققوا منها حرام

وشوف عيني يوم قفوا به جحول

عزوةٍ ما بين خاله والعمام

وحفروا له حفرةٍ بالخد طول

طولها والعرض شبرين تمام

شوف عيني والضبا عنده تجول

باغيات الموادع والسلام

والطيور الطايرة فوقه تجول

فوق قبره كاتفاتٍ كالغمام